உலகம்

உக்ரைனுக்குள் ஊடுருவியதால் பல குடும்பங்களின் பிரிவுக்குக் காரணமாகியிருக்கிறார் ரஷ்ய அதிபர் புடின்.

தாய்நாட்டைக் காக்கும் அதே நேரத்தில், தந்தையாக, கணவனாக, தனது குடும்பத்தினரை பாதுகாப்பதற்காக, தங்கள் மனைவி பிள்ளைகளை வேறு நாடுகளுக்கு அகதிகளாக அனுப்பி வைத்துவிட்டு, போரிடப் புறப்படுகிறார்கள் உக்ரைன் ஆண்கள்.  

அவ்வகையில், தன் இரண்டு பிள்ளைகளுக்கும், அன்பு மனைவிக்கும் பிரியாவிடை கொடுத்து அனுப்பும் ஒரு உக்ரைனியரைக் காட்டும் புகைப்படங்கள் வெளியாகி நெஞ்சை நெகிழவைத்துள்ளன.

மத்திய உக்ரைனிலுள்ள Poltava என்ற இடத்தைச் சேர்ந்தவர் Roman Overchenko (32). சேல்ஸ் மேனேஜரான Roman, தன் நாட்டுக்குள் ஊடுருவியுள்ள ரஷ்ய படையினரை எதிர்கொள்வதற்காக ஆயுதம் ஏந்த முடிவு செய்துள்ளார்.

இந்நிலையில், மற்ற ஆண்களைப் போலவே, தான் தன் தாய்நாட்டுக்காக போரிட முடிவு செய்துள்ள அதே நேரத்தில், தன் மனைவியையும் பிள்ளைகளையும் பாதுகாப்பான நாடு ஒன்றிற்கு அனுப்பிவைக்க முடிவு செய்கிறார் Roman.  

ஆனால், இனி பிள்ளைகளைப் பார்க்கமுடியுமா என்பது தெரியாத நிலையில், பிள்ளைகளுக்கு விடைகொடுப்பது எளிதா என்ன?

ஆரு வயது மகள் Dasha, அப்பாவின் கழுத்தைக் கட்டிக்கொண்டு, போகாதீர்கள் அப்பா என்கிறாள். அழுகை முட்டிக்கொண்டு வருகிறது Romanக்கு.

அந்த வழியே நடந்து செல்வோர் இந்தக் காட்சியைக் கண்டு ஒரு கணம் திகைத்து நிற்கிறார்கள்.

அடுத்து இரண்டு வயது மகன் Margoவைக் கட்டிக்கொள்ள, அப்பா ஏன் அழுகிறார் என்பது புரியாத அந்தக் குழந்தை விழிக்கிறது. அதைப் பார்த்து Romanஇன் மனைவி Evheniya (30) தான் கலங்கினால் பிள்ளைகள் பயப்படுவார்களே என்று தன்னை அடக்கிக்கொண்டு குனிந்து கண்ணீரை மறைத்துக்கொள்ள முயல்கிறார், ஆனால், கண்ணீர் கண்ணுக்குள் நிற்காமல் பீறிடுகிறது.

மீண்டும் அப்பாவின் கழுத்தைக் கட்டிக்கொண்டு விட மறுக்கிறாள் Dasha. ஆனாலும், வலுக்கட்டாயமாக அவளிடமிருந்து தன்னைப் பிரித்துக்கொண்டு பின்னோக்கி அடி எடுத்துவைக்கிறார் Roman. அடுத்து, காதல் மனைவிக்கு பிரியாவிடை கொடுக்கும் நேரம்.

இருவரும் அணைத்துக்கொள்கிறார்கள், ஒருவருக்கொருவர் ஆறுதல் சொல்லிக்கொள்கிறார்கள். அதற்கு மேல் அங்கு நிற்க முடியாமல் பிள்ளைகளுடன் தன் தந்தையின் காரில் ஏறுகிறார் Romanஇன் மனைவி Evheniya.

மனைவி பிள்ளைகளுடன் கார் புறப்பட, வலுக்கட்டாயமாக முகத்தில் புன்னகை ஒன்றை வரவழைத்துக்கொண்டு குடும்பத்தினரைப் பார்த்து கையசைக்கிறார் Roman.